Þórður Jónasson EA 350

Löndun í Krossanesi 1964. Ljósm. VÞH

Í Húsvíkurhöfn 2021, eða 57 árum seinna. Ljósm. VÞH

A. Þórður Jónasson EA 350 var smíðaður í Noregi hjá Stord Verft, sem er í eigu Akersgruppen. Kom til Akureyrar 11. júní 1964. Skipið er 300 brl. stálskip með 700 ha. Wichmann díselvél. Það er smíðað fyrir Valtý Þorsteinsson útgerðarmann á Akureyri og Sæmund Þórðarson skipstjóra á Stóru Vatnsleysu (Nafn bátsins: Þórður Jónasson er faðir Sæmundar). Í blaðagrein frá komudegi kemur m.a. fram: „Þórður Jónasson er stærsta fiskiskip, sem byggt hefur verið fyrir Íslendinga, þegar frá eru taldir togarar og verður að líkindum stærsta skipið sem í sumar stundar síldveiðar fyrir Norður- og Austurlandi.“ Árið 1970 var gengið var frá sölu eignarhluts Sæmundar til útgerðar Valtýs Þorsteinssonar.
B. Árið 1973 var skipið lengt um 2,5 metra hjá Haugesunds slipp í Noregi.
C. Árið 1978 var Þórður yfirbyggður hjá Slippstöðinni á Akureyri.
D. Árið 1985 kom ný brú og breytingar gerðar á matsal. Unnið af Vör hf Akureyri. Ári seinna 1986 var Þórður lengdur um 6,5 metra hjá Stord verft í Noregi og í kjölfarið kom ný 1430 ha. Caterpillar aðalvél. Nánast eins og nýtt skip um 9 metrum lengra en í upphafi, helmingi aflmeiri vél, tvöfaldur burður, yfirbyggt, nýjustu tæki, nýjar ljósavélar og margt, margt fleira. 1987 Nýtt spil og renna auk tækja. 1989 Nótakrani og annar búnaður. 1990 Aðalspil stækkun og fl.
E. 1994 Bakki, dekkkrani og kjölur – Slippstöðin Akureyri Árið 2001 selur Valtýr Þorsteinsson hf skipið til SR-mjöls.
F. Árið 2003 var skipið selt til Stykkishólms (Gullhólmi SH201). Árið 2015 fór það til Húsavíkur (Hörður Björnsson ÞH 260). Einhverjar breytingar voru gerðar hjá nýjum eigendum eftir 2001. Árið 2021 var skipinu siglt til Belgíu til niðurrifs. Það hét þá Hörður Björnsson eftir hinum farsæla skipstjóra sem hafði starfað við útgerð Valtýs og Hreiðars í 40 ár.

Alþýðumaðurinn 20. tbl. 11. júní 1964

Nýtt skip bætist í flotann

M/s Þórður Jónasson RE 350. Eigendur Valtýr Þorsteinsson, Akureyri og Sæmundur Þórðarson, Stóru- Vatnsleysu.

Í dag kom hingað til Akureyrar frá Noregi nýtt 300 tonna fiskiskip, Þórður Jónasson RE 350. Eigendur eru Valtýr Þorsteinsson, útgerðarmaður hér, og Sæmundur Þórðarson, skipstjóri, Stóru Vatnsleysu, er sigldi skipinu heim og verður skipstjóri á því. Sæmundur hefur síðastliðin tvö ár verið skipstjóri á Akraborg og áhöfnin að kalla sú sama og þar var.

Samningur um smíði skipsins var gerður við A/S Akers mek. Verksted Oslo, en skipið byggt hjá Stord Verft, Stord, en Stord Verft er ein af þeim skipasmíðastöðvum, sem eru í Akers gruppunni, og er m/s Þórður Jónasson fyrsta skipið, er þeir byggja fyrir Íslendinga. Umboðsmaður hér á landi fyrir Akers mek. Verksted er Péur O. Nikulásson, Reykjavík.

Þórður Jónasson er stærsta fiskiskip, sem byggt hefur verið fyrir Íslendinga, þegar frá eru taldir togarar og verður að líkindum stærsta skipið, sem í sumar stundar síldveiðar fyrir Norður- og Austurlandi.

M/s Þórður Jónasson er byggður í klassa Norsk Veritas + 1A1 ISC Havfiske og samkvæmt kröfum skipaskoðunar ríkisins og er vandaður að allri gerð. Skipið er búið öllum beztu öryggis- og fiskileitartækjum, svo sem tveimur dýptarmælum, sem báðir eru með sjálfleitandi asdic útfærslu, öðrum af Simrad gerð og hinum af Atlasgerð, Kelvin Huges radar, Arkas sjálfstýringu, Koden miðunarstöð og Koden Loran, Simrad sendistöð 100 vatta. Frystilest er í skipinu og tvær aðskildar fiskilestar með aluminium uppstillingu og plastklæddri innsúð. Er hægt að kæla báðar fiskilestarnar.

Íbúðir fyrir 14 menn eru allar aftur í skipinu, í eins og tveggja manna klefum.

Aðalvél er Wickmann 700 hestafla og þrjár Lister hjálparvélar, er geta framleitt um 100 kw af rafmagni. Allar vindur eru olíudrifnar og má frátengja þær úr stýrishúsi. Hægt er að hafa tvær nætur í senn á bátaþilfari.

Á heimsiglingu frá Noregi reyndist skipið mjög vel. Ganghraði þess í reynsluför varð 13 mílur.

Stýrimaður á m/s Þórði Jónassyni verður Sigurður Kristjánsson, Hafnarfirði, og vélstjórar þeir Björn Sigurbjörnsson, Reykjavík, og Tómas Kristjánssson, Akureyri.

Skipið mun hefja síldveiðar næstu daga.

🔗 Timarit